على أنهارك يغر تستاهل تكون
أرواح الزكية الطاهرة اجسور
وطن وبلا وطن ذل ينكط العيش
و حرام اعلى الذليل ايعيش مقهور
حسبه ومن يكضي الحـسبة وتفوت
إذا تطلك الـحسبة ابخلك مكسور
آهك يا وطن ينولد من آه
مثل بركان يطهي ابروحك ويفور
اكل بيك الغدر بنياب الذيـاب
لأن وجهك امان وطيبك نور
بيك جروح كثرة و كيف اداويك
ويا جرح الاكضه بجرح مأسور
عليمن تنتجي و بـجنابك ارماح
و طوفان المآسي اب بحرك ايدور
منين اتسير وانت ابحقل الالغام
و ممكن فرد خطوة وجدمـك ايثور
وحدك والزمان امكاون اوياك
و عافاك المحميته ابذره الشاجور
طعن بيك الرضع من جفك الطيب
ونزع وجه الوفا من كال مشكور
حط سرج المهر و سدلك السير
وصفت عثرة اكحيلك من السيور
والفرهد السلة و حشم اعداك
هذاك الأمنيته و جان ناطور
كل ذنبك عروبي الفعل و القـول
و لا حثك ضـيرك تلف و تـدور
سهلة و هم تطوف الضيج الايـام
وتحب جــف الـخبز شفت التنور
ويـرجعلك ذليل العافك ابــعوز
ويــرجـاك العفو و دكله مـعذور
وترد دينك اســنين الكحط والجوع
ويــشد مـن كبوته اكحيلك المنصور
وتبني ابكل شموخ اسـوار عيـــلام
وتـجيك الخلك كلــه اطوف و تزور
30-1-2010
